Góublót Súgfirðinga
21.02 2009 – Mikil stemmning var á góublóti Súgfirðinga laugardagskvöldið 21. febrúar þar sem 165 manns skemmtu sér saman. „Eins og sagt er í hvert sinn þá var þetta besta blótið til þessa. Góð stemmning og góð mæting á okkar vísu“, segir Óðinn Gestsson í skemmtinefnd. Blótið var haldið á ný í félagsheimilinu en það hefur farið fram í íþróttahúsinu undanfarin ár. „Það var fínt að koma aftur í félagsheimilið þótt hinn staðurinn hefði verið fínn líka, en þetta var einhvern veginn heimilislegra“, segir Óðinn. Aðspurður hvað hafi staðið upp úr í skemmtiatriðum segist Óðinn ekkert vilja segja til um það. „Þetta var bara einnar nætur sýning sem menn munu lifa á næstu tvö árin. Ég held að flestir hafi farið á kostum og margur leikarinn hafi brotist fram og leyndir draumar verið uppskornir þetta kvöld.“ Að gömlum súgfirskum sið halda karlar góublót annað hvert ár og konur á Suðureyri þorrablót. Var þetta í sjötugasta og fjórða sinn sem haldið er blót á Suðureyri og þrítugasta og sjöunda sinn sem karlar halda góublót. Á blótið koma allir með sinn þorramat í trogum, en reynt er að halda góublót í kringum síðasta dag þorra. Að loknu borðhaldi spilaði vestfirska hljómsveitin Kraftlyfting fyrir dansi fram á rauða nótt. „Þetta eru snyrtilegir ungir menn og það sem ég sá af þeim fóru þeir á kostum“, segir Óðinn. Páll Önundarson mætti á blótið og tók þar meðfylgjandi myndir.