Fiskveisla Íslandssögu og Klofnings
Hin árlega fiskveisla Íslandssögu hf. og Klofnings ehf. á Suðureyri var haldin laugardaginn 20. maí. Fyrirtækin buðu að venju starfsfólki sínu og mökum þeirra ásamt fleiri góðum gestum og mættu alls um 240 manns til veislunnar. „Þetta heppnaðist frábærlega vel, það var góður matur, góð mæting og gott prógramm“, segir Óðinn Gestsson framkvæmdastjóri Íslandssögu. „Við buðum líka sjávarútvegsklasanum, það eru fiskvinnslufyrirtækin á Vestfjörðum. Sjávarútvegsráðherra var heiðursgestur og einnig buðum við framboðunum í veisluna, B, D og Í, og mættu fulltrúar frá þeim“. Boðið var upp á 11 fiskrétti úr þorski, ýsu og steinbít, allt framleiðsla fyrirtækjanna sjálfra. Einnig var boðið upp á smálúðu sem litlu bátarnir gáfu. Skemmtiatriðin voru ekki af verri endanum, karlakórinn Ernir söng og Elfar Logi skemmti. Leyninúmerið var síðan hafnarstjórinn á Ísafirði, Muggi, sem sló í gegn. Hann tók 3 lög og að sögn Óðins fylltist þá dansgólfið. Páll Önundarson var í hófinu og tók þar meðfylgjandi myndir.