Súgfirðingar blótuðu þorra í þétt setnu félagsheimilinu á Suðureyri á laugardagskvöld. Hefð er fyrir því á Suðureyri að konur á staðnum standi fyrir þorrablóti annað hvert ár og svara karlarnir fyrir sig hin árin með góublóti. Súgfirðingar gerðu krásum troganna góð skil og sungu undir borðum á milli. Þá var salurinn rýmdur og tekið til við skemmtidagskrá sem konurnar fluttu við góðar undirtektir blótsgesta. Dúettinn Baldur og Margrét sá svo um að leika fyrir dansi fram eftir nóttu. Ýmsar reglur eru í gildi um það hverjir fái aðgang að þorrablótinu. Að sögn Ingibjargar Sigfúsdóttur, eins skipuleggjenda, er almenna reglan sú að gestir skulu vera sambúðarfólk og hafa náð 25 aldri en einhleypir, 18 ára og eldri, fá að mæta í fylgd foreldra. Reglurnar standa á gömlum merg en Ingibjörg segir 68 ár frá því þorra- og góublót Súgfirðinga hófu göngu sína. Páll Önundarson var á staðnum og tók það meðfylgjandi myndir.