Háafell ehf hóf formlega laxeldi í Ísafjarðardjúpinu í síðasta mánuði. Gauti Geirsson framkvæmastjóri Háafells segir að fyrstu laxaseiðin hafi verið sett út í Vigurálnum þann 16. maí og hefur það gengið vel að hans sögn.
„Hægt og rólega í sumar mun svo seiðunum fjölga og jafnframt munum við koma fyrir fóðurpramma Háafells sem er í þessum töluðu orðum í drætti á leið til Íslands.“
Háafell hefur fengið leyfi fyrir 6.800 tonna eldi á regnbogasilungi og frjóum laxi í Ísafjarðardjúpi. Heimilt er að ala 12.000 tonn af frjóum lax í Djúpinu eftir ákvörðun Hafrannsóknarstofnunar um að nýta ekki 30.000 tonna burðarþolsmati svæðisins í því skyni að vernda laxastofna í Laugardalsá og Langadalsá.
Liggja fyrir umsóknir frá Arctic Fish og Arnarlax um allt að 20.000 tonna eldi af frjóum lax en aðeins 5.200 tonna framleiðsluheimildir eru til ráðstöfunar.
