Samkvæmt frétt á heimasíðu Rannís þá hefur Íþróttanefnd ríkisins ákveðið að úthluta 22.990.000,- úr Íþróttasjóði til 79 verkefna fyrir árið 2022. Nefndinni bárust alls 132 umsóknir að upphæð rúmlega 291 milljón króna um styrki úr sjóðnum.
Alls bárust 80 umsóknir um styrki til að bæta aðstöðu til íþróttaiðkana að upphæð rúmlega 221,7 m. kr. Styrkumsóknir um fræðslu- og útbreiðsluverkefni voru 48 að upphæð um 63,4 m. kr. og umsóknir vegna íþróttarannsókna voru fimm, að upphæð rúmlega 6,67m. kr.
Til ráðstöfunar á fjárlögum 2022 eru rúmar 22 m. kr. en samkvæmt reglugerð um Íþróttasjóð fara ósóttir styrkir aftur til sjóðsins til úthlutunar. Einnig er kostnaður við rekstur íþróttanefndar og kostnaður Rannís vegna umsýslu sjóðsins tekinn af styrkfé sjóðsins.
Alls verða 42 umsóknir styrktar sem falla undir flokkinn ,,Aðstaða“, 32 umsóknir úr flokknum ,,Fræðsla og útbreiðsla“ og 4 umsóknir úr flokknum ,,Rannsóknir“.
Á Vestfjörðum fékk Héraðssamband Vestfirðinga 50,000 kr. til búnaðarkaupa og Körfuknattleiksfélag Ísafjarðar -unglingaráð fékk 2 styrki hvorn að upphæð 100,000 kr, annars vegar til kaupa á búnaði til körfuboltaiðkunar og hins vegar til styrktarþjálfunar og fræðslu um mikilvægi hennar.
