Hafsteinn Már Sigurðsson íþróttamaður Ísafjarðarbæjar 2021

Hafsteinn Már Sigurðsson, leikmaður í blakdeild Vestra, hefur verið útnefndur íþróttamaður Ísafjarðarbæjar.

Frá þessu er greint á vefsíðu Ísafjarðarbæjar.

Í rökstuðningi fyrir tilnefningu Hafsteins segir:

„Hafsteinn Már byrjaði að æfa blak á Ísafirði 9 ára gamall eða fljótlega eftir að krakkablakið hóf að ryðja sér til rúms hér fyrir vestan. Hann var lengi vel einn af þeim lágvaxnari í sínum æfingahóp en æfði grimmt og gaf því öðrum iðkendum ekkert eftir á vellinum. Eftir því sem árin liðu, fór Hafsteinn Már að banka uppá í karlaliðinu. Fyrstu skiptin sem hann var á leikskýrslu, var hann ekki nema 13 ára. Hafsteinn Már er fjölhæfur leikmaður og hefur td. spilað allar stöður á vellinum. Hann var valinn í draumalið úrvalsdeildarinnar veturinn 2020-2021, var valinn efnilegasti leikmaður í úrvalsdeildinni af þjálfurum deildarinnar tímabilið 2020-2021 og er í æfingahóp A-landsliðs karla. Hafsteinn Már er fyrirliði blakdeildar Vestra, er einn af öflugustu leikmönnum í úrvalsdeildinni og góð fyrirmynd fyrir yngri iðkendur.“

Carneiro efnilegastur

Efnilegasti íþróttamaður ársins 2021 er Sudario Eiður Carneiro úr handknattleiksdeild Harðar. Sudario er ungur og efnilegur leikmaður sem hefur náð miklum framförum sl. tvö ár og er mikilvægur hlekkur í toppliði Harðar í 1. deildinni. Í rökstuðningi segir meðal annars: „Sudario er frábær leikmaður og liðsfélagi, sem gefur sig ávallt allan fram innan sem utan vallar. Hann er vel liðin af liðsfélögum og drífur þá áfram með krafti sínum. Einnig er hann iðinn við félagsstörf í þágu Harðar og er alltaf reiðubúinn til að aðstoða þegar kemur að hinum ýmsu verkefnum. Sudario, sem er aðeins 17 ára, hefur allt til að bera til að verða handboltamaður í hæsta gæðaflokki og er hann einn af þeim efnilegustu sem sést hefur í vestfirskum handbolta.“

Sudario Eiður, efnilegasti íþróttamaður Ísafjarðarbæjar 2021.

Foosavatnsgangan fékk hvatningarverðlaun

Þá hlaut Fossavatnsgangan hvatningarverðlaun íþrótta- og tómstundanefndar, en árlega veitir nefndin þessi verðlaun fyrir óeigingjarnt starf í þágu íþróttahreyfingarinnar. Fossavatnsgangan hefur stækkað töluvert undanfarin ár og setur nú mikinn svip á bæjarfélagið ár hvert. Gangan er með elstu íþróttaviðburðum á landinu sem enn eru við lýði, ef ekki sú elsta. Að göngunni kemur fjöldinn allur af sjálfboðaliðum úr samfélaginu okkar, sem tekur þátt ár eftir ár. Með dugnaði og elju forsvarsmanna keppninnar og sjálfboðliðum tekst þeim að gera þessa sögufrægu skíðagöngukeppni að glæsilegum viðburði, bænum til mikils sóma.

Kristbjörn Róbert Sigurjónsson tók við hvatningarverðlaunum fyrir hönd Fossavatnsgöngunnar.

Facebook Notice for EU! You need to login to view and post FB Comments!