Hagfræðistofnun Háskóla Íslands hefur tekið saman skýrslu um hagvöxt landshluta árin 2012-2019.
Skýrslan nær til tímabilsins sem einkenndist af uppgangi eftir fjármálahrunið. Í skýrslunni kemur m.a. fram að litlu munar á hagvexti á höfuðborgarsvæðinu og utan þess árin 2012-2019. Að jafnaði er vöxtur á ári 1½-2% meiri en undanfarna fjóra áratugi.
Utan höfuðborgarsvæðisins er hagvöxtur mismikill, þó að hann sé alls staðar vel yfir núlli. Tveir landshlutar gnæfa yfir aðra: Suðurnes, þar sem framleiðsla jókst að jafnaði um 8½% á ári og Suðurland, þar sem hagvöxtur var að jafnaði 5%.
Athygli vekur nokkuð stöðugur vöxtur á Vestfjörðum, þar sem framleiðsla og byggð virtust um tíma vera í afturför. Minnst jókst framleiðsla á Austurlandi, þar sem atvinnulíf er sennilega enn að laga sig að hinni miklu viðbót sem þar varð með álveri í Reyðarfirði á fyrsta áratug aldarinnar.
