Vegagerðin hefur sent frá sér tilkynningu um að niðurstaða stofnunarinnar eftir athugun sé að hafa núverandi skip til ferjusiglinga yfir Breiðafjörð meðan samningur um þjónustuna er í gildi en huga að endurnýjun ferjumannvirkja. Ekkert skip fannst sem uppfyllir framsettar kröfur.
Samráðsnefnd Tálknafjarðar og Vesturbyggðar tók málið fyrir í síðustu viku. Verður ekki sagt að ákvörðun Vegagerðarinnar hafi verið tekið fagnandi.
Samráðsnefndin bókaði eftirfarandi:
„Samráðsnefnd telur ákvörðunina algjörlega óásættanlega og kallar eftir skýrum svörum frá Vegagerðinni um hvernig öryggi farþega Baldurs sé tryggt og hvert viðbragðið sé verði samskonar óhöpp og urðu í júlí 2020 og mars 2021 þar sem Baldur varð vélavana á leið sinni um Breiðafjörð.
Bæjarstjóra Vesturbyggðar og sveitarstjóra Tálknafjarðarhrepps falið að kalla eftir svörum frá Vegagerðinni og leggja fyrir á næsta fundi samráðsnefndar.“
