Unnið er að því af hálfu Umhverfisráðherra að Þjóðgarður á Vestfjörðum verði stofnaður 17. júní næstkomandi. Guðmundur Ingi Guðbrandsson, umhverfisráðherra upplýsti þetta á Alþingi í gær í svari við fyrirspurn Höllu Signýjar Kristjánsdóttur, alþm. Umhverfisráðherra sagði dagsetninguna vera að ósk heimamanna.
Halla Signý Kristjánsdóttir vakti athygli á því í fyrirspurninni að þjóðgarðurinn myndi ná yfir 351 ferkilómetra svæði sem væri 4% af flatarmáli Vestfjarða. Hún taldi sátt ríkja um friðunarsvæðin en lagði áherslu á að ná víðtækri sátt um reglurnarnar sem koma til með að gilda um svæðið.
Halla Signý spurðist fyrir um það hvað uppbyggingin sem fyrirhuguð væri næstu 5 árin myndi kosta. Umhverfisráðherra svaraði því til að greining stæði yfir á uppbyggingu svæðisins og niðurstaða hennar myndi liggja fyrir í þessum mánuði
.
Eins spurðist Halla Signý Kristjánsdóttir ítrekað fyrir um það hvort fjármögnum væri tryggð. Ráðherra vísaði til landsáætlunar en sagði þó það væri víst að ráðinn yrði þjóðgarðsvörður og aðstoðarmaður hans.
