Í gær tilkynnti Fiskistofa um að ráðherra hefur undirritað reglugerð þess efnis að óheimilt verði að veiða á rauðum dögum á strandveiðivertíðinni 2021.
Þannig verður ekki hægt að stunda strandveiðar á uppstigningardag 13. maí, annan í hvítasunnu 24. maí, þjóðhátíðardaginn 17. júní eða frídag verslunarmanna 2. ágúst eins og heimilt var á síðasta ári.
Á vefsíðu Landsambands smábátaeigenda segir að helstu rökin fyrir því að óska eftir að rauðir dagar séu settir á ný í reglugerð um strandveiðar séu eftirfarandi:
• Veruleg fjölgun báta í upphafi vertíðar.
• 162% aflaaukning fyrstu þrjá dagana miðað við í fyrra – úr 225 tonnum í 588 tonn.
• Veiðarnar stöðvaðar 19. ágúst í fyrra.
• Ekki tryggt enn sem komið er að 48 dagar verði niðurstaðan.
Með breytingunni er hægt að teygja sóknina sem lengst inn í ágúst þegar að jafnaði fæst hærra verð en í maí.