Uppskrift vikunnar

Eftir kjötát páskana, auðvitað fyrir utan Föstudaginn langa er einstaklega gott að fá sér góðan fisk.
Þekki fáa sem borða ekki plokkfisk, hvað þá þegar hann er settur í sparifötin.
Persónulega finnst mér best að nota meira smjör enda gæti ég lifað á smjöri og gouda ost en auðvitað fer það eftir smekk hvers og eins.

Verði ykkur yndislega vel að góðu.

Innihald:

  • 800 g hvítur fiskur (ýsa eða þorskur)
  • 2 laukar
  • 160 g smjör
  • 2 pakkar af bernaise sósu (t.d. knorr)
  • 6 dl mjólk
  • 650 g kartöflur
  • Rifinn ostur

Plokkfiskur er góður gratíneraður og því skal byrja á því að hita ofninn í 220°C. Sjóða skal bæði fisk og kartöflur. Til að flýta fyrir suðunni á kartöflunum er ágætt að afhýða þær og brytja niður áður en þær eru soðnar. Þá er nóg að sjóða þær í 10-15 mín, svipað og fiskinn. Þegar suðunni er lokið er vatninu helt af bæði fisk og kartöflum. Laukurinn er skorinn niður og smjörið brætt í potti. Þegar smjörið er bráðið þá er lauknum bætt útí og leyft að sjóða í smjörinu við vægan hita þar til hann er búinn að mýkjast vel. Passið að hafa ekki of háan hita á smjörinu. Þegar laukurinn er til þá er bernaise duftinu úr pökkunum bætt við ásamt mjólkinni og hrært vel. Leyft að malla í um 2 mín. Þá er fisk og kartöflum bætt við og hrært vel saman. Plokkfiskurinn er að lokum settur í eldfast mót og ostur yfir.
Skella inní ofn og leyfa ostinum að bráðna og taka á sig gullinn lit. Þá er plokkfiskurinn til og ekkert eftir nema að borða hann með bros á vör með yndislegu rúgbrauði auðvitað.

Ýtt er af stað að nýju á bæjarins besta þættinum uppskrift vikunnar sem verður á föstudögum.

Vonandi er að lesendur hafi bæði gagn og gaman að. Ábendingar um uppskriftir eru vel þegnar.

Umsjónarmaður þáttarins er Halla Lúthersdóttir.

Facebook Notice for EU! You need to login to view and post FB Comments!