Fiskeldi: Tvöföldun á milli ára

Útflutningsverðmæti eldisafurða nam um 5,5 milljörðum króna í mars. Þetta er langstærsti mánuðurinn í útflutningi á eldisafurðum frá upphafi.

Miðað við sama tíma í fyrra er þetta tvöföldun á útflutningsverðmætum á föstu gengi og ef miðað er við næststærsta mánuðinn voru verðmætin nú í mars 40% meiri. Miðað við verðmæti vöruútflutnings frá Íslandi í heild nam útflutningsverðmæti eldisafurða um 9%, sem er langhæsta hlutfall frá upphafi.

Útflutningsverðmæti sjávarafurða var 26,9 milljarðar króna í mars og því er ljóst að fiskur var mjög fyrirferðarmikill í útflutningi í mánuðinum, eða um 53% af verðmæti vöruútflutnings í heild.

Þetta má sjá í bráðabirgðatölum um vöruskipti sem Hagstofan hefur birt, en nánari sundurliðun á einstaka eldisafurðum verður birt undir lok mánaðar.

Á fyrsta ársfjórðungi er útflutningsverðmæti eldisafurða komið í rúma 11,5 milljarða króna, sem er um 31% aukning miðað við sama tímabil í fyrra á föstu gengi.

Athugasemdir

athugasemdir