Forval verður hjá VG í Norðvesturkjördæmi

Vinstrihreyfingin grænt framboð í Norðvesturkjördæmi verður með forval til að ákveða framboðslista fyrir komandi alþingiskosningar.

Flokkurinn á nú einn þingmann í kjördæminu; Lilju Rafney Magnúsdóttur á Suðureyri, en varaþingmaður er Bjarni Jónsson á Sauðárkróki.

Talið er að þau muni bæði gefa kost á sér áfram.

Kjörstjórn hefur nú auglýst eftir frambjóðendum. Forvalið fer fram með rafrænum hætti dagana 23., 24. og 25. apríl, en kosning hefst á miðnætti 23. apríl og stendur til kl. 17.00 25. apríl.

Kosið verður um fimm efstu sæti á listanum, þar af bindandi í efstu þrjú en í samræmi við forvalsreglur VG.

Framboðsfrestur rennur út á miðnætti 2. apríl. Þá mun kjörstjórn taka við tilnefningum almennra félaga um frambjóðendur fram til 26. mars á netfangið nordvestur@vg.is 

Atkvæðisbær í forvalinu eru allir sem skráðir eru í hreyfinguna í kjördæminu tíu dögum fyrir kjörfund, eða 13. apríl.

Athugasemdir

athugasemdir