Þjóðlendukröfur ríkisins: sveitarfélögin búast til varna

Sveitarfélögin við Djúp eru með kröfur ríkisins fyrir Óbyggðanefnd til athugunar og búast til varna.

Bragi Þór Thoroddsen, sveitarstjóri í Súðavík segir að Súðavíkurhreppur muni bregðast við kröfum Óbyggðanefndar með fulltingi lögmanns eða lögfræðings.

Hann segir að kröfur óbyggðanefndar séu talsvert umfangsmiklar í sveitarfélaginu enda hreppurinn landfræðilega stór. Flestar krafna lúta að landi í yfir 600 m hæð en þó eru undantekningar frá því, m.a. í Hestfirði og Ísafirði.

„Það verður tekin afstaða til þess hverjum verður falið að svara kröfunum á næsta fundi sveitarstjórnar þann 13. nóvember 2020, en frestur er til 1. febrúar 2021.“

Jón Páll Hreinsson, bæjarstjóri í Bolungavík segir að bærinn sé búinn að ráða sér lögfræðing í þessu máli. Það er einkum krafa ríkisins um Bolafjall sem veldur áhyggjum. Jón Páll bendir á að Utanríkisráðuneytið hafi 1985 gert samning við Bolungavíkurkaupstað þar sem ríkið tekur á leigu undir ratsjárstöð land á Bolafjalli 2500 fermetrar og 6,7 hetktara opið svæði til viðbótar. Krafa ríkisins skjóti því skökku við.

Jón Páll segir að krafa ríkisins geti haft áhrif á framtíðarstefnu og sýn bæjarins vegna útsýnispallsins sem verið er að byggja á Bolafjalli. „Við erum að deiliskipuleggja svæðið og viljum tengja það við ferðaþjónustu á Vestfjörðum. Við sjáum fyrir okkur að Bolafjall verði byrjun á ferðalagi ferðamanna til Vestfjarða en ekki endastöð.“ Hann segir að til standi að halda opinn fund um málið og þar sem kröfur bæjarins verði ræddar.

Birgir Gunnarsson, bæjarstjóri í Ísafjarðarbæ sagði að málið væri í í skoðun hjá  lögmanni bæjarins og ekki liggi fyrir hver viðbrögð bæjarins verða við þessum kröfum ríkisins. En .það myndi skýrast vonandi fljótlega.

 

Facebook Notice for EU! You need to login to view and post FB Comments!