HG: stéttarfélögin kæra og vilja sjópróf

Fimm stéttarfélög hafa ákveðið að kæra til lögreglu og krefjast að auki sjóprófs vegna framgöngu fyrirtækisins Hraðfrystihúsið Gunnvör hf í síðustu veiðiferð skipsins Júliusar Geirmundssonar ÍS 270.

Þetta kemur fram nú í kvöld á vef Verkalýðsfélags Vestfirðinga.

 

Yfirlýsing stéttarfélaganna:

Stéttarfélög skipverja á Júlíusi Geirmundssyni ÍS 270 funduðu með lögmönnum í morgun um sameiginlegar aðgerðir vegna framgöngu Hraðfrystihússins Gunnvarar hf. og hunsun á tilmælum yfirvalda um viðbrögð við hópsmiti um borð í togaranum. Stéttarfélögin telja þessa framgöngu vítaverða og hafa ákveðið bæði að kæra málið til lögreglu og krefjast þess að fram fari sjópróf. Stéttarfélögin eru sammála um að nauðsynlegt sé að rannsaka málið í kjölinn, fá allar staðreyndir upp á yfirborðið og draga þá til ábyrgðar sem stóðu að þeirri ákvörðun að halda skipinu til veiða í stað þess að bregðast við stöðunni með ábyrgum hætti.

Félag skipstjórnarmanna

Sjómannafélag Íslands

Sjómannasamband Íslands

Verkalýðsfélag Vestfirðinga

VM – félag vélstjóra og málmtæknimanna

Athugasemdir

athugasemdir