Ætla má að fyrirsjáanlegur samdráttur í ferðaþjónustu á þessu ári hafi minnst áhrif á lækkun útsvarstekna sveitarfélaga á Vestfjörðum samkvæmt því sem lesa má úr skýrslu Byggðastofnunar sem birt var nú í morgun.
Skýrsluna vann Byggðastofnun unnin fyrir Samgöngu- og sveitarstjórnarráðuneytið og athuguð voru áhrif hruns ferðaþjónustu vegna Covid-19 á sveitarfélögin. Mikilvægi ferðaþjónustu var greint niður á einstök svæði og sveitarfélög og sést þá að hlutur ferðaþjónustu í atvinnutekjum er hvað lægstur á Vestfjörðum. Hlutfallið er 2,3% á norðanverðum vestfjörðum og 3,2% annars staðar á Vestfjörðum.
Fjöldi gistinótta á Vestfjörðum á síðasta ári var nærri 217 þúsund af 8,4 milljónum sem er um 2,6%. Í Ísafjarðabæ voru gistinæturnar 81 þúsund og og rúmlega 135 þúsund annars staðar á Vestfjörðum. Ferðaþjónusta var minna byggð á erlendum ferðamönnum á Vestfjörðum er annars staðar. Þrjátíu prósent gistinóttanna vorus elda innelndum ferðamönnum og er hlutfallið hvergi hærra á landinu að frátöldum Vestmannaeyjum. Meðaltalið fyrir hlut innlendra ferðamanna í gistingunni var 13%.
Fjöldi hótelherbergja á landinu jókst um nærri 70% frá 2015 til 2020 og fór úr 6 þúsundum í 10.700 herbergi. Á Vestfjörðum varð þróunin hins vegar í öfuga átt. Hótelherbergjunum fækkaði úr 76 í 60 og var það eini landshlutinn sem fækkun varð á þessum uppgangsárum í ferðaþjónustu.
Aðeins á einu sviði ferðaþjónustunnar er hlutur vestfjarða verulegur. Það er í komum skemmtiferðaskipa. Til Ísafjarðar komu 126 skip á síðasta ári og voru aðeins á Akureyri og í Reykjavík fleiri skipakomur enda telur Byggðastofnun að áhrifin af covid verði veruleg á tekjur Ísafjarðarhafnar.
Byggðastofnun telur að lækkun útsvarsstofns sveitarfélag samkvæmt áætlaðri lækkun atvinnutekna í helstu greinum ferðaþjónustunnar næstu tólf mánuði verði 8,2% á landsvísu og um og yfir 20% í sumum sveitarfélögum. En á Vestfjörðum eru áhrifin talin verða frá 1,3% til lækkunar í Reykhólahreppi upp í 4,7% í Vesturbyggð og Súðavík. Á Ísafirði er lækkunin talin verða 4,4%. Er þetta um og innan við helmingur af tekjulækkun sveitarfélaganna á landsvísu.
