Ráðherra ákveður heildarafla fyrir rækjuveiðar við Snæfellsnes

Kristján Þór Júlíusson, sjávarútvegs- og landbúnaðarráðherra, hefur gefið út reglugerð um leyfilegan heildarafla fyrir rækjuveiðar við Snæfellsnes.

Reglugerðin er í samræmi við ráðgjöf Hafrannsóknastofnunar og er í gildi til 15. mars 2021.

Rækjuafli við Snæfellsnes var mestur árin 1992–1995. Vísitala veiðihlutfalls var há þessi ár og í kjölfarið hrundi stofninn.
Síðan þá hefur vísitala veiðihlutfalls sveiflast í kringum markgildi.
Stofnvísitalan hefur verið sveiflukennd en lág frá árinu 2017 miðað við meðaltal áranna 2008-2016.

Í samræmi við varúðarsjónarmið lagði stofnunin til að rækjuveiðar verði ekki meira en 491 tonn við Snæfellsnes, en þetta er töluverð hækkun frá síðasta ári þegar leyfilegur heildarafli var 393 tonn.