Ísafjarðarbær: 3,4 m.kr. vegna verkefnisstjóra á Flateyri

Bæjarráð Ísafjarðarbæjar hefur samþykkt 3,4 m.kr. viðauka við fjárhagsáætlun 2020 vegna verkefnisstjóra á Flateyri sem ákveðið hefur verið að koma á fót. Starfið hefur þegar verið auglýst og rennur umsóknarfrestur út 18.maí.

Verkefnisstjórinn verður starfsmaður Ísafjarðarbæjar en ríkið greiðir helming launakostnaðar samkvæmt samningi þar um. Samningurinn er milli Samgöngu- og sveitarstjórnarráðuneytis, Ísafjarðarbæjar og Vestfjarðastofu ses. og er um framkvæmd Nýsköpunar- og þróunarverkefnis fyrir Flateyri.

Um er að ræða 100% starf til þriggja ára og þarf viðkomandi að geta hafið störf sem fyrst. Meginstarfsstöð verkefnisstjóra verður á Flateyri.

Samningurinn byggir á greinargerð og tillögum aðgerðarhóps í kjölfar snjóflóðanna á Flateyri, dags. 2. mars 2020 og samþykkt ríkisstjórnarinnar frá 14. apríl 2020 um
framkvæmd og eftirfylgni aðgerða.

Umræddur launakostnaður er kr. 6.800.000  fyrir tímabilið 18. maí 2020-31. desember 2020. Tekjur vegna helmings launakostnaðar fyrir sama tímabil er kr. 3.400.000  og fellur jafnhá fjárhæð á bæjarsjóð á árinu.

Viðaukinn verður tekinn fyrir til endanlegrar afgreiðslu á fundi bæjarstjórnar í dag.