Covid: tvö ný smit í Bolungavík í gær

Í gær var tilkynnt um tvö ný smit á Vestfjörðum. Bæði voru þau í Bolungavík.

Alls hafa nú verið greind 77 smit í öllu umdæminu. Átta einstaklingar hafa náð bata og eru því virk smit 67, öll staðsett á norðanverðum Vestfjörðum. Mikill fjöldi lauk sóttkví í gær, flestir í Bolungarvík. Alls eru nú 151 einstaklingur í sóttkví í umdæminu og 67 í einangrun.

Þetta kemur fram í tilkynningu frá lögreglunni á Vestfjörðum.

Alls hafa verið tekin 489 sýni til rannsóknar í umdæminu, 229 á Ísafirði, 209 í Bolungarvík (rúmlega 20% m.v. íbúðafjölda), 32 á sunnanverðum Vestfjörðum, 11 í Súðavík, 3 Hólmavík/Strandir og 5 á Reykhólum. Alls voru 56 sýni tekin í gær sem biðu niðurstöðu.

Í gær og fram til föstudags verður skimun meðal íbúa á norðanverðum Vestfjörðum fyrir Covid-19, um er að ræða samvinnuverkefni HVEST Íslenskrar erfðagreiningar. Áætlað er að taka um 1200 – 1500 sýni.

Sýnin eru tekin við Björgunarsveitarhúsið í Bolungarvík og á Ísafirði í Kampaskemmunni, Crossfitstöðinni, skoðunarstöð Frumherja og við kjallara sjúkrahússins í Ísafirði. Verkefnið er unnið af starfsfólki Hvest ásamt sjálfboðaliðum. Gylfi Ólafsson, forstjóri Heilbrigðisstofnunar Vestfjarða segir að margir sjálfboðaliðanna séu kennarar og sýni þeir að þeim er margt til lista lagt.