Bæjarstjórn Ísafjarðarbæjar samþykkti í einum rómi tillögu bæjarráðs um að ráða Bryndísi Ósk Jónsdóttur í stöðu sviðsstjóra stjórnsýslu- og fjármálasviðs Ísafjarðarbæjar. Var tillagan í samræmi við tillögu Intellecta sem aðstoðaði við ráðninguna. Fimmtán umskjendur voru um stöðuna.
Mun hún hefja störf á næstu dögum. Sviðsstjóri er staðgengill bæjarstjóra og gegnir skyldum bæjarritara.
Bryndís er með meistaragráðu í lögfræði, B.Sc. gráðu í viðskiptalögfræði, lögmannsréttindi (hdl) og diploma í opinberri stjórnsýslu, auk þess að hafa lokið námskeiðum í jafnlaunavottun og verkefnastjórnun.
Bryndís hefur meðal annars starfað sem fulltrúi og staðgengill sýslumanns og síðar sem aðstoðarsaksóknari og staðgengill lögreglustjórans á Vestfjörðum á sviði löggæslu, saksóknar og stjórnun rannsókna.
