Hallgrímur Sveinsson látinn

Hallgrímur Sveinsson, Brekku Dýrafirði er látinn. Hann lést á heimili sínu gær. Hallgrímur var fæddur 28. júní 1940.

Hallgrímur Sveinsson er f.v. kennari og skólastjóri á Þingeyri og einnig Hrafnseyri.

Hallgrímur Sveinsson var í áratugi staðarhaldari á Hrafnseyri við Arnarfjörð og lagði sig fram um að halda nafni Jóns Sigurðssonar  forseta, sögu hans og arfleifð á lofti. Hann og eiginkona hans, Guðrún Steinþórsdóttir, bjuggu á Hrafnseyri í rúm 40 ár, ráku þar fjárbúskap og sáu um vörslu og umhirðu staðarins fyrir hönd Hrafnseyrarnefndar.

Undir nafni Vestfirska forlagsins hefur Hallgrímur í um tuttugu og fimm ára skeið gefið út fjölda bóka, sem langflestar eru helgaðar vestfirsku efni með einum eða öðrum hætti.

Vestfirska forlagið hefur á síðari árum gefið út allt upp í tuttugu og þrjá titla á ári.

Hallgrímur var afkastamikill í ritstörfum og skrifaði fjöldann allan af greinum, ýmist einn eða með öðrum, til birtingar á vef Bæjarins besta, sem hann studdi með ráðum og dáð.

Að leiðarlokum eru Hallgrími færðar þakkir fyrir framlag sitt og aðstandendum hans eru sendar innilegar samúðarkveðjur.

Athugasemdir

athugasemdir