Gamlir framsóknarkarlar á landsbyggðinni líklegastir til að borða skötu

Lítið lát er á vinsældum skötunnar en rúmur þriðjungur landsmanna heldur á vit hennar í dag. Hefur hlutfall þeirra sem halda í skötuhefðina haldist um þetta bil frá því að mælingar MMR á jólahefðum landsmanna hófust árið 2011. Alls voru 37% sem sögðust ætla að borða skötu á Þorláksmessudag þetta árið, 2 prósentustigum fleiri en í fyrra.

Skatan reyndist líkt og fyrri ár vinsælli hjá körlum heldur en konum en 44% karla sögðust ætla að gæða sér á hinu kæsta ljúfmeti á Þorláksmessu þetta árið, samanborið við 30% kvenna. Þá höfðaði skatan líkt og áður einnig meira til eldri kynslóða heldur en þeirra yngri en 58% svarenda 68 ára og eldri sögðust ætla að fara í skötu í ár, samanborið við einungis 21% þeirra 18-29 ára. Þá virðist sem að skötuhefðin haldi áfram að vera ríkari á landsbyggðinni heldur en á höfuðborgarsvæðinu en 46% svarenda af landsbyggðinni kváðust ætla að borða skötu á Þorláksmessu, samanborið við 32% þeirra af höfuðborgarsvæðinu.

Stuðningsfólk Framsóknarflokksins (58%) reyndist líklegast allra til að segjast hyggja á að skella sér í skötu á Þorláksmessu þetta árið. Eitthvað virðist hafa dregið úr hlutfalli skötuelskenda á meðal stuðningsfólks Miðflokksins en 41% þeirra kváðust ætla í skötu þetta árið, samanborið við 54% í könnun síðasta árs. Líkt og í mælingum síðasta árs naut skatan minnstra vinsælda á meðal stuðningsfólks Pírata en einungis 24% þeirra hyggja á skötuát þetta árið.

Niðurstaðan úr þessari könnun er því sú að að eldri karlar sem eru Framsóknarmenn og búa á landsbyggðinni eru líklegastir til að borða skötu, en konur í flokki Pírata á aldrinum 18-29 ára og búa á höfuðborgarsvæðinu eru ólíklegastar allra til að borða skötu á Þorláksmessu.