Ingólfsfjörður: Bönd og hælar sett upp að nýju

Bönd og hælar, sem afmarka svæði þar sem fornminjar eru, og tekin voru niður í Ingólfsfirði í síðustu viku hafa verið sett upp aftur. Margrét Hrönn Hallmundsdóttir, fornleifafræðingur staðfestir það. Hún fór norður á laugardaginn og segir að hún hafi að þessu sinni verið með borða sem eru greinilegri og meira áberandi en fyrri borðar.

Meðfylgjandi er mynd af fornleifafræðing að merkja minjar. Hún heitir Kristín Sylvía Ragnarsdóttir.
Mynd: Margrét Hrönn Hallmundsdóttir.

Hælar og bönd voru tekin niður á nokkrum stöðum í Ingólfsfirði með þeim afleiðingum að fornminjasvæði voru ekki lengur afmörkuð. Verktaki mátti því ekki nálgast þau svæði fyrr en búið var að merkja þau aftur. Ekki er talinn neinn vafi á því, samkvæmt heimildum Bæjarins besta, að hælarnir og böndin voru tekin niður.

Friðrik Friðriksson hjá Vesturverki ehf segir að verkið gangi vel. Vegurinn í Ingólfsfirði sé lagfærður, drenaður og teknar nibbur og verstu beygjurnar lagfærðar. Hann býst við því að nálgast Seljanesi í lok vikunnar.