Húsnæðismarkaðurinn í jafnvægi?

Í nýjum markaðspunktum greiningardeildar Arionbanka segir að verðbólga fari lækkandi. Árshækkunin síðustu 12 mánuði sé 3,1% en var 3,3% í síðasta mánuði. Það er einkum þrennt sem greiningardeildin nefnir því til skýringar.

Í fyrsta lagi að hækkun flugmiða í millilandaflugi hafi orðið mun lægri en hefur verið á þessum tíma árs frá 2013. Það er ekki það sem búist var við og telur greiningardeildin enn rétt að hafa varann á sér og að svo geti farið að fall WOW air muni á endanum leiða til hærra verðs. Önnur ástæða er að verð á húsgögnum og heimilisbúnaði hafi lækkað meira vegna áhrifa frá útsölum en von var á.

húsnæðisverð ýtir ekki lengur undir verðbólgu

Þriðaj ástæðan er að árshækkun á húsnæðisverði er aðeins 3,5% síðustu 12 mánuði  sem er minna en lengi hefur verið.  Segir greiningardeildin að útlit sé fyrir að húsnæðismarkaðurinn sé kominn í ágætis jafnvægi, ef svo má að orði komast. Undanfarna 16 mánuði hefur húsnæðisverð utan höfuðborgarsvæðisins hækkað hraðar en á höfuðborgarsvæðinu en það skýrist helst af húsnæðisverðshækkunum í “Kraganum” eða gróflega skilgreint bæjarfélögum í, um eða innan við klukkustundar akstursfjarlægð frá höfuðborginni.

„Nú hefur hækkunartaktur húsnæðisverðs utan höfuðborgarsvæðisins hins vegar hefur lækkað nokkuð hratt eða úr 10,3% í maí í 4,9% nú í júlí og því virðist verðlagning á staðsetningu vera að komast í betra jafnvægi“ segir í greiningunni og „teljum við að dagar húsnæðisliðarins sem stórstjörnu verðbólguteymisins séu liðnir og framundan séu mjög hóflegar húsnæðisverðshækkanir.“

Facebook Notice for EU! You need to login to view and post FB Comments!