Í göngunum var haldið áfram með lagningu frárennslis- dren- og ídráttarlagna í hægri vegöxl og er nú búið að leggja um 1.800 metra auk þess sem byrjað var að leggja drenlögn í vinstri vegöxl. Vinna við lokastyrkingar á kaflanum frá gegnumbroti og að Arnarfirði er nánast búin en klárað var að setja bergbolta og sprautusteypa í vinstri vegg alla leið að munna. Einungis er eftir að klára að sprauta í þekjuna á stöku stað. Í framhaldinu verður svo farið í lokastyrkingar á kaflanum frá gegnumbroti að munnanum í Dýrafirði. Haldið var áfram með að merkja fyrir boltafestingum fyrir vatnsvörn og bora fyrir boltunum auk þess sem byrjað er að festa bolta í veggi og þekju. Efni var keyrt í vegfyllingu í göngunum á stuttum kafla.
Vinna við uppsteypu á fyrsta tæknirýminu í göngunum hófst en í heildina eru fjögur tæknirými í göngunum.
Klárað var að steypa sökklana fyrir vegskálanum í Dýrafirði og er búið að steypa fyrstu tvær steypurnar í yfirbyggingunni.
Haldið var áfram með vegagerð í Dýrafirði og var aðallega unnið við skeringar og fyllingar í fláafleyga. Haldið var áfram með mölun á efni úr Nautahjalla en efnið verður notað í efri lög vegarins.
