Ég hef séð kött fara kringum heitan graut.

Þvílíkur kisuleikur upphófst eftir að Mannréttindadómstólnum í Strassbúrg blöskraði subbuskapur og fúsk eins ráðherra á Íslandi. Mér óaði mest við tístinu í forsætisráðherranum sem var bara sammála síðasta ræðumanni íhaldsins. Enginn gerði svo sem ráð fyrir miklu upploki framsóknarmanna enda alsælir við ketkatlana sem er þeirra rórill í pólitík fyrr og síðar. Engu líkara en Vinstri grænir væru komnir með bensínstíflu sem höfðu hæst árið 2017 þegar sami dómsmálaráðherra og ,,vék til hliðar“ á miðvikudag framdi þann gjörning að kasta fjórum umsækjendum hæfisnefndar um Landsyfirréttinn (svo) út um gluggann í Skuggasundi og bæta við öðrum fjórum að eigin geðþótta. Enginn þingmaður Vinstri grænna tjáði sig um málið nú utan forsætisráðherra og ljóst að handjárnin voru tiltæk í flokksherberginu hjá slökkvitækjunum. Skýrleikskonunni Þórhildi Sunnu, pírata, klígjaði við orðræðunni þegar strax var byrjað á því að gera Mannréttindadómstólinn að blóraböggli. Dómstóllinn var skyndilega orðinn versti óvinur Íslendinga og farinn að ráðast inn í helg vé íslenskra stjórnmála. Þetta var sem sé pólitískur dómur sem gæti haft víðtækar afleiðingar um alla álfuna. Hann var hins vegar að bregðast við embættisafglöpum Sigríðar Andersen frá því í hitteðfyrra og hafði þó gengið maður undir manns hönd að skýra út fyrir henni að líklega væri hún að fremja mannréttindabrot. Hæstiréttur Íslands hefur þegar komist að þeirri niðurstöðu að röksemdafærsla hennar um feril og gæði fjórmenninganna sem hún klastraði inn í staðinn hafi verið í skötulíki að hætti hússins. Þremur þeirra sem fóru út um gluggann hafa verið dæmdar miska- og skaðabætur og verður Strassbúrg ekki kennt þar um.

Nú er haldreipi hins hliðarstigna ráðherra að yfirdómurinn í Strassbúrg skammist sín og komi með betri niðurstöðu fyrir Ísland. Hljóti þá að álíta að svífyrðilegt mannréttindabrot hafi alls ekki verið framið á fjórmenningunum heldur þvert á móti stimpli fúsk og subbuskap ráðherrans sem góða og gilda vöru.

Varla.

Þegar ótíðindin dundu yfir á þriðjudag var byrjað að hamast á Alþingi. Þegar því var komið til skila að þingmenn fengu litlar sem engar upplýsingar frá dómsmálaráðherra um nýju fjórmenningaklíkuna fannst þeim ekki taka því að láta bera hvern og einn upp til atkvæðagreiðslu í þinginu. Því var fjórpakkinn borinn upp og samþykktur. Þá voru í stjórn Sjálfstæðisflokkur, Viðreisn og Björt framtíð. Eftir að þessi rök höfðu verið á borð borin tók sú vandræðaríkisstjórn sem nú situr að hamast að Mannréttindadómstólnum. Hann var miklu betri óvinur en Alþingi enda í útlöndum. Réttast væri líklega að segja sig úr bölvuðum dómnum sem svo freklega hefði hlutast til um íslensk innanríkismál. Og fjármálaráðherrann og formaður Sjálfstæðisflokksins spurði í beinni útsendingu hvort Íslendingar hefðu afsalað sér dómsvaldi til erlends dómsvalds?

Ha?

Ég vona bara að grauturinn sé farinn að kólna á þriðja dómsdegi og kötturinn geti nú einbeitt sér með skýrum huga að því að hesthúsa supplið sitt.

bogi.

Athugasemdir

athugasemdir