Breytingartillögur meirihluta fjárlaganefndar Alþingis lækkuðu framlög til bæði byggðamála og samgönguframkvæmda. Tillögurnar voru samþykktar fyrir helgi.
Til byggðamála lækka rekstrarframlög um 40 milljónir króna og verða 1.993,7 milljónir króna. Segir í skýringum meirihluta nefndarinnar að það sé vegna þess að aðkeypt vinna lækki um 40 milljónir króna.
Framlög til fjárfestingar í samgöngum lækka um 406,1 milljónir króna og verða framlögin eftir lækkun 24.544,2 milljónir króna. Lækkunin er tæplega 2%. Gefin er sú skýring að um sé að ræða 400 milljóna króna tímabundna lækkun hjá Vegagerðinni vegna breyttra forsendna fjárlagafrumvarpsins.
Meirihluti fjárlaganefndar tekur fram í áliti sínu að framlög til samgöngumála hækki milli ára um 13,9% vegna átaks í samgöngumálum til næstu þriggja ára.