Nýkjörin hreppsnefnd Reykhólahrepps liggur nú undir feldi og íhugar leiðaval fyrir nýjan veg um hreppinn. Sveitarstjórn breytti aðalskipulaginu fyrir áratug fyrir svonefnda B leið sem liggur um Teigsskóg. B leiðin varð síðar að Þ-H leið eftir smávægilegar breytingar og hefur sveitarstjórnin gert viðeigandi breytingar á aðalskipulaginu.
En afstaða Reykhólahrepps lá fyrir miklu fyrr. Í desember 2005 skrifar sveitarstjóri Reykhólahrepps, Einar Örn Thorlacius bréf til Skipulagsstofnunar sem lýsir umsögn sveitarstjórnar um mat á umhverfisáhrifum. Þar stendur:
Reykhólahreppur leggur áherslu á mikilvægi vegabóta í Gufudalssveit fyrir íbúa og aðra vegfarendur. Vísað er til fyrirliggjandi skýrslu Rannsóknastofnunar háskólans á Akureyri “Samfélagsáhrif og arðsemi” sem fjallar um vegtengingar á Vestfjörðum. Þar kemur vel fram mikilvægi styttinga í Gufudalssveit (svokölluð leið B) þar sem vegurinn verður á láglendi.
og ennfremur segir í bréfinu:
Sem fyrr mælir hreppsnefnd eindregið með leið B, enda eiga brattir fjallvegir að heyra sögunni til. Sú leið liggur í gegnum Teigsskóg. Huga þarf að því að taka eins lítið rými undir veginn sjálfan og kostur er, þannig að sem minnst verði gengið á skóginn sjálfan.
Í sama mánuði skila öll þrjú sveitarfélögin í Barðastrandasýslu sameiginlegri umsögn til Skipulagsstofnunar um matsskýrslu um umhverfisáhrif, það er Vesturbyggð, Tálknafjarðarhreppur og Reyhólahreppur. Þar er minnt á skýrslu sem sveitarfélögin létu vinna fyrir sig:
Í júlí 2005 gaf Rannsóknastofnun Háskólans á Akureyri út skýrsluna Samanburður vegtenginga á Vestfjörðum, Vestfjarðavegur og Djúpvegur – samfélagsáhrif og arðsemi, sem stofnunin vann fyrir sveitarfélögin. Skýrsluna létu sveitarfélögin vinna m.a. vegna þess algera skorts á umfjöllun um samfélagslega þýðingu þeirra samgöngubóta sem hér um ræðir
og áfram segir í bréfinu:
Þá þótti skorta sýn á víðara samhengi samgöngubótanna en næði bara til þessara þriggja sveitarfélaga, sýn á þá framþróun sem verður með samgöngubótum annars staðar á Vestfjörðum og hvaða framtíðarhlutverki þessar tilteknu samgöngubætur gegna í því samhengi. Sveitarfélögin leggja því þessa skýrslu RHA formlega fram til Skipulagsstofnunar með umsögn þessari
og loks:
Sveitarfélögin fagna því að Vegagerðin skuli fallast á kröfu þeirra, og ákveða að leið B verði fyrir valinu sem kostur Vegagerðarinnar í 2. áfanga framkvæmdarinnar á milli Þórisstaða og Krakár, enda hefur leiðin algjöra yfirburði yfir leiðir C og D, hvað varðar styttingu vegar og ferðatíma, og hvað vegtæknilega þætti og umferðaröryggi snertir.