Þolinmæðin er löngu þrotin

Í ljósi fréttaflutnings af fyrirhugaðri samgönguáætlun vill bæjarráð Vesturbyggðar koma eftirfarandi á framfæri.

Við hörmum algjört skilningsleysi stjórnvalda á brýnni þörf svæðisins fyrir mannsæmandi vegum til og frá svæðinu. Nefnum þar sérstaklega Bíldudalsveg og Dynjandisheiði en búið er að fjárfesta fyrir gríðarlega fjármuni í Dýrafjarðargöngum sem ekki munu nýtast sem sú samgöngubót sem þeim var ætlað að vera.

Það er með ólíkindum að ekki standi til að klára vegagerð yfir Dynjandisheiði og ofan í Arnarfjörð til Bíldudals og óásættanlegt með öllu.
Vesturbyggð hefur algjöra sérstöðu vegna þess að grunntengingu í formi vega með bundnu slitlagi skortir alfarið sama í hvaða átt er litið.

Jafnframt er kallað eftir því að hnúturinn um veginn um Gufudalsveit verði leystur.

Þolinmæði íbúa er löngu þrotin og kallað er eftir skilningi og tafarlausum aðgerðum.

Bæjarráð Vesturbyggðar

Athugasemdir

athugasemdir