Þjóðlegir réttir á okkar veg – ertu með?

Matarauður Íslands og Hótel- og matvælaskólinn efna til hugmynda- og uppskriftasamkeppni um þjóðlega rétti við þjóðvegina okkar. Kannski verður þín hugmynd á matseðli veitingastaða hringinn í kringum landið?

Það getur verið erfiðleikum bundið að skilgreina hvað sé þjóðlegur matur. Vissulega getum við leitað til hefðanna og sagt sem svo: Þetta er þjóðlegt, þetta er íslenskt. Það er hins vegar hluti þess að lifa í samfélagi að taka hlutina til endurskoðunar öðru hverju og þróa í takt við tíðarandann.

Tengjum umræðuna næstu daga við íslenskt hráefni og matarmenningu. Deilum matarminningum með hvert öðru og sjáum hvaða hugmyndir þjóðin kemur með. Hótel- og matvælaskólinn velur 15 rétti úr innsendum hugmyndum og eldar fyrir dómnefnd. Fimm réttir standa síðan upp úr sem vinningsréttir. Veitingahús hringinn í kringum landið í samstarfi við okkur, velja einn af þeim 15 réttum sem komast í undanúrslit, á matseðilinn sinn í sumar.

Það má senda inn hefðbundnar og óhefðbundar hugmyndir í gömlum eða nýjum búningi. Okkar skilningur er þó að þjóðlegir réttir spretta alltaf upp úr íslensku hráefni. Sérstaklega verður tekið tillit til þess ef saga á bak við réttinn fylgir með.

Hægt er að skrá hugmynd eða uppskrift á www.mataraudur.is til 1. maí. Úrval uppskrifta og hugmynda verða birtar á vef Matarauðs Íslands 11. maí næstkomandi og þar verður hægt að líka við hugmyndirnar og deila á samfélagsmiðlum.

Það er mikilvægt að gleyma ekki uppruna sínum, halda vel utan um söguna og bera virðingu fyrir því liðna, og því ókomna.

Nánari upplýsingar gefur Brynja Laxdal verkefnastjóri Matarauðs Íslands sími 8601969 eða brynja.laxdal@anr.is og Sigurður Daði Friðriksson fagstjóri matreiðslu við Hótel- og matvælaskólann sími 8220662 eða sigurdur.dadi.fridriksson@mk.is

Sæbjörg

sabjorg@gmail.com