Ingólfur Árnason forstjóri Skagans 3X tók í gær við viðskiptaverðlaunum Viðskiptablaðsins. Það var Bjarni Benediktsson fjármálaráðherra sem afhenti Ingólfi verðlaunin. Í rökstuðningi Viðskiptablaðsins segir m.a.: „Hátæknifyrirtækið Skaginn 3X er að umbylta matvælaiðnaði, sérstaklega í sjávarútvegi, með nýjum og framsæknum lausnum. Fyrirtækið sérhæfir sig í kæli- og vinnslutækni og framleiðir í dag íslaus kælikerfi, alsjálfvirk lestarkerfi fyrir fiskveiðiskip og verksmiðjur fyrir vinnslu á uppsjávarfiski. Þó Skaginn 3X sé tiltölulega nýtt nafn í hugum margra þá stendur það á gömlum merg. Skaginn 3X er sameiginlegt vörumerki þriggja systurfyrirtækja; Skagans hf., Þorgeirs & Ellerts hf. og 3X Technology ehf.“
Fyrirtækið Skaginn 3X hefur vaxið hratt síðustu misseri og ár. Starfsmannafjöldinn hefur margfaldast og velta Skagans hf., eins dótturfélaganna þriggja, nam 4,3 milljörðum króna árið 2016, sem var 42% aukning frá árinu 2015. Vöxtur fyrirtækisins endurspeglast ágætlega í því að fyrir skömmu undirritaði Skaginn 3X um fimm milljarða króna samning við færeyska fyrirtækið Varðin Pelagic um byggingu uppsjávarverksmiðju á Suðurey í Færeyjum. Verksmiðja sú mun geta afkastað 1300 tonnum af unni og pakkaðri vöru á sólarhring.
Sjálfur segir Ingólfur Árnason að nú séu að verða kaflaskil hjá fyrirtækinu. Búið sé að þróa einstakar vörur og nú þurfi að nýta tækifærið til fullnustu. „Við erum komin með vörur sem við teljum alveg einstakar og jafnframt teljum við að þær eigi gríðarlega mikið inni á markaðnum. Það er ástæðan fyrir því að við höfum verið að stækka mjög hratt síðustu misseri. Það er til þess að geta nýtt þau tækifæri sem ég held að okkar nýja tækni muni veita okkur. Ég trúi því að næstu tvö ár verði mjög viðburðarík hjá Skaganum 3X. Heimurinn er opinn fyrir okkar tækni,“ segir Ingólfur Árnason. Nánar er rætt við Ingólf í nýjasta tölublaði Viðskiptablaðsins.
smari@bb.is
