Íbúafundur í Árneshreppi

Mynd: Byggdastofnun.is

Þriðjudaginn 28. nóvember var haldinn íbúafundur í Árneshreppi á Ströndum sem liður í samtali við íbúa vegna verkefnisins Brothættar byggðir, en sveitarfélagið hefur nýverið verið tekið inn í verkefnið. Mjög góð mæting var á fundinn og sköpuðust líflegar og málefnalegar umræður. Þetta kemur fram á vef Byggðastofnunar.

Á fundinum var farið yfir drög að stefnumótun fyrir verkefnið sem unnin höfðu verið af verkefnisstjóra og verkefnisstjórn og komu íbúar athugasemdum sínum á framfæri. Stærstu áherslumál íbúa/verkefnisins tengjast innviðum en fjölmörg önnur atriði verða til úrvinnslu í verkefninu.  Íbúar Árneshrepps voru almennt sammála um framgang flestra þessara mála og virðist sem góður samhljómur sé í þeirri baráttu sem framundan er. Ákveðið var að fjölga í verkefnisstjórn og voru þær Vigdís Grímsdóttir og Linda Guðmundsdóttir kosnar sem fulltrúar íbúa, auk þeirra sem fyrir voru. Í kjölfar fundarins standa íbúar fyrir kosningu um heiti á verkefnið og má vænta niðurstöðu innan fárra daga.

Sigríður K. Þorgrímsdóttir, Skúli Gautason, verkefnisstjóri, Eva Sigurbjörnsdóttir, Vigdís Grímsdóttir, Arinbjörn Bernharðsson, Linda Guðmundsdóttir, Kristmundur Kristmundsson, Aðalsteinn Óskarsson og Kristján Þ. Halldórsson. Mynd: Byggdastofnun.is

Áfram verður unnið að stefnumótun fyrir verkefnið og stefnt er að því að þeirri vinnu ljúki á næstu dögum. Að þeirri vinnu lokinni mun verkefnið færast yfir á framkvæmdastig.

bryndis@bb.is

DEILA