„Víðtækar breytingar eru að verða á hafinu – þegar kemur að hitastigi, hafstraumum og efnafræðilegum eiginleikum. Súrnun sjávar er raunveruleg og alvarleg ógn sem stafar að lífríki sjávar. Kóralrifjum, sem eru fræg fyrir líffræðilega fjölbreytni, bíður svört framtíð – bókstaflega – með hækkandi hitastigi og súrnun.“ Þetta kemur fram í yfirlýsingu íslenskra stjórnvalda sem var lesin upp á loftlagsþingi Sameinuðu þjóðanna í dag. Í yfirlýsingunni i kemur fram að ástæða sé til að hafa áhyggjur af framtíð lífríkisins umhverfis Íslands og þar með sjávarútvegsins.
Bent er á að á fáum stöðum sé hnattræn hlýnun augljósari en á Íslandi. Vatnajökull, sá stærsti í Evrópu, minnki hratt, ár frá ári. „Jöklar gætu að miklu leyti horfið á einni eða tveimur öldum,“ segir í yfirlýsingunni.
