Ekki átakalaust að veiða í jólamatinn

Framundan er fyrsta rjúpnahelgin í ár, en veiðar hefjast á föstudaginn. Ætla má að fjöldi veiðimanna sé að yfirfara útbúnað sinn til veiðanna og skipuleggja veiðferðir. Rjúpnaveiðar eru líkamlega erfiðar og krefjast úthalds og útbúnaðar við hæfi. Umhverfisstofnun bendir veiðimönnum á að margt er líkt með rjúpnaveiðum og fjallgöngu. Veiðimaðurinn þarf að vera fær um fjallgöngu bæði hvað varðar útbúnað og þol. Það gengur því ekki átakalaust að veiða rjúpur í jólamatinn. Huga þarf einnig vel að veðri.

Einnig er mikilvægt að gera ferðaáætlun sem allir veiðifélagar viti af og líka þeir sem heima sitja. Þannig er hægt að kalla til hjálp ef veiðimaður skilar sér ekki á tilsettum tíma. 112 smáforritið fyrir snjallsíma er gagnlegt fyrir veiðimenn í því sambandi. Hægt er að sækja smáforritið á safetravel.is.

Veiðifélagar sem leggja af stað til veiða að morgni ættu að sammælast um komutíma í bíl og virða þá ferðaáætlun. Sé einhver ekki kominn á tilsettum tíma og ekki næst samband við hann er mikilvægt að kalla til hjálp áður en myrkur skellur á. Það er því mikilvægt að hafa í huga hversu langt á eftir að ganga þegar skyggja tekur. Heppilegt er að hafa meðferðis áttavita, GPS-tæki, höfuðljós og farsíma/talstöð. Farsíminn þarf að vera í vatnsheldu hulstri og heppilegt er að hafa með auka rafhlöður í hann og GPS-tækið.

Réttur til veiða á landi ræðst af eignarhaldi landsins og Umhverfisstofnun áréttar mikilvægi þess að veiðimenn þekki eignarhald þar sem þeir hyggjast veiða og virða rétt landeigenda til að stjórna veiðum á sínu landi. Ennfremur þarf að hafa í huga að ákveðin landsvæði hafa verið friðlýst. Þegar svæði er friðlýst er ekki sjálfgefið að veiðar séu bannaðar. Það hvílir skylda á veiðimönnum að kynna sér í hverju tilfelli fyrir sig hvaða reglur gilda um það landsvæði sem þeir hyggjast veiða á. Ábyrgðin er veiðimannsins. Hægt er að finna upplýsingar um friðlýst svæði á vefsvæði Umhverfisstofnunar. Þar er hægt að sjá hvort veiðar séu heimilar eða ekki samkvæmt friðlýsingunni.

smari@bb.is

DEILA