Að mati Runólfs Ólafssonar, framkvæmdastjóra Félags íslenskra bifreiðaeigenda, koma auknir eldsneytisskattar sem fjármálaráðherra boðar í nýju fjárlagafrumvarpi verst niður á þeim sem búa fjarri þjónustu, sumsé í dreifbýlinu. Runólfur segir í samtali við blaðamann mbl.is að í hinum dreifðu byggðum sé dísilbíllinn æskilegri út frá mengun og umhverfissjónarmiði auk þess sem dísilbílar séu eyðslugrennri þegar ferðirnar eru lengri. „Það er verið að refsa þeim sem búa í dreifbýli,“ segir hann um 21 krónu hækkun á dísilolíu. „Sérstaklega þeim sem þurfa að sækja grunnþjónustu um langan veg.“
Runólfur bendir í þessu samhengi á að nýir dísilbílar uppfylli staðla (svokallaða Euro 6 staðla) sem dragi meðal annars mjög úr losun á sótögnum. Þeir standi því nýjum bensínbílum í það minnsta jafnfætis þegar kemur að mengun, en mengi jafnvel minna.
smari@bb.is