Halla Signý Kristjánsdóttir, skrifstofu- og fjármálastjóri Bolungarvíkurkaupstaðar, ætlar að gefa kost á sér í annað sæti á lista Framsóknarflokksins í Norðvesturkjördæmi í komandi þingkosningum. Elsa Lára Arnardóttir hefur vermt sætið í tvennum kosningum en ætlar að draga sig í hlé.
„Það brennur ýmislegt á mér nú sem endranær og hef skoðanir á ýmsum málum og hef fundið mínar leiðir til að koma þeim á framfæri. Margar leiðir eru færar og tækifærin nokkur.
Því hef ég ákveðið að gefa kost á mér í 2. sæti á lista Framsóknarflokksins í Norðvesturkjördæmi fyrir næstu alþingiskosningar,“ skrifar Halla Signý á Facebooksíðu sinni.
Hún segir verkefni næsta kjörtímabils vera að koma á festu í íslenskum stjórnmálum og vinna af heilindum til að auka traust á þeim sem vinna að stefnumótun í íslenskum stjórnmálum.
Gunnar Bragi Sveinsson sækist eftir oddvitasæti Framsóknar í kjördæminu, en hann hefur leitt listann síðan í kosningunum 2009. Ásmundur Einar Daðason, fyrrverandi þingmaður VG og Framsóknarflokks, hefur ákveðið að gefa kost á sér í fyrsta sætið.
Á aukakjördæmaþingi Framsóknaflokksins í Norðvesturkjördæmi, sem fór fram um helgina, var ákveðið fara skuli fram tvöfalt kjördæmisþing fyrir val á lista flokksins í kjördæminu fyrir komandi alþingiskosningar. Kjördæmisþingið fer fram á Bifröst 8. október og sama dag verður einnig haldið aukakjördæmaþing þar sem listinn verður samþykktur.
smari@bb.is
