Forstjóri Hafrannsóknarstofnunar segir við gerð áhættumats stofnunarinnar vegna mögulegrar erfðablöndunar frá laxeldi í sjókvíum á Vestfjörðum og Austfjörðum hafi áhættan af erfðablöndun verið skoðuð en ekki ávinningur nálægra byggðalaga vegna atvinnuuppbyggingar laxeldis. „Þetta byggir á bestu fáanlegu þekkingu en við gerum okkur grein fyrir því að við vitum ekki hvernig þetta verður í raun og veru,“ segir Sigurður Guðjónsson, forstjóri Hafró í samtali við blaðamann mbl.is.
Forráðamenn Bolungarvíkurkaupstaðar, Ísafjarðarbæjar og Súðavíkurhrepps hafa gagnrýnt vinnu stefnumótunarnefndar í fiskeldi harðlega og segja áhættumat Hafró vera hornstein í vinnu nefndarinnar. Í yfirlýsingu frá bæjarstjórum sveitarfélaganna í gær segir að hagsmunir íbúa og sveitarfélaga við Djúp séu ekki metnir í vinnu nefndarinnar og saka nefndina um að standa að hrossakaupum fiskeldisfyrirtækja og veiðiréttarhafa. Þeir fara fram á að tekið verði fullt tillit til efnahagslegra hagsmuna íbúa við Djúp í vinnu nefndarinnar, en Hafró hefur lagt til að banna laxeldi í Ísafjarðardjúpi til að vernda laxastofna í Hvannadalsá, Langadalsá og Laugardalsá.
„Hlutverk okkar var að gera þetta mat og sjá hvar og hversu mikið væri hægt að ala af lax. Þetta er niðurstaðan núna með bestu upplýsingum sem við höfum, en við færðum þekkingu mest frá Noregi yfir til Íslands. Svo verður reynslan að segja hvernig þetta verður,“ segir Sigurður á vef Morgunblaðsins og bætir við að niðurstöðurnar gefi til kynna að áhrif erfðablöndunar sé mun staðbundnari en talið var áður en ráðist var í gerð áhættumatsins.