Bestu þakkir Þorsteinn

Magnús Reynir Guðmundsson

Í 30 ár hefur Þorsteinn Jóhannesson, yfirlæknir og skurðlæknir á Ísafirði,

Þjónað Vestfirðingum nær nótt og dag. Ef einhver einstaklingur á Ísafirði

verðskuldar virðingu og þakklæti, umfram annað samferðafólk okkar, þá er

það Þorsteinn Jóhannesson.

 

Þann 16. maí s.l. sendi forstjóri  HVEST frá sér fréttatilkynningu þar sem segir,

að „samkvæmt samkomulagi milli forstjóra Heilbrigðisstofnunar Vestfjarða og

Þorsteins Jóhannessonar skurðlæknis og yfirlæknis sjúkrasviðs  HVEST, mun

Þorsteinn láta af störfum við heilbrigðisstofnunina 15. júlí n.k.  eftir tæplega

30 ára starf.  Svo mörg voru þau orð.

Ekki kemur fram hvort „samkomulag“ þetta hafi verið gert að frumkvæði

Þorsteins  eða HVEST.  Ekki hefur heyrst að Þorsteinn, sem er nýlega orðinn 66

ára , hyggðist láta af störfum fyrr en efni stæðu til.  Ekkert segir um það hvort

HVEST hafi nú þegar tryggt Vestfirðingum skurðlækni til að fylla skarð Þorsteins.

Skurðlæknar liggja nú ekki beint á lausu í landinu, en vitað er að Þorsteinn vann

þrekvirki við að tryggja afleysingalækna, þegar hann þurfti á fríum að halda.

Það er margt sem sækir á hugann þegar lesin er tilkynningin um brotthvarf

Þorsteins, sem fram kemur á heimasíðu HVEST 16. maí s.l.

Er hugsanlegt að forstjóri HVEST sé að boða nýja stefnu í heilbrigðismálum

Vestfjarða ( landsbyggðarinnar ) sem geri m.a. ráð fyrir því að ekki skuli vera

skurðlæknir á HVEST ?. Hefur heilbrigðisráðuneytið markað slíka stefnu og hafa

núverandi stjórnendur Heilbrigðisstofnunar Vestfjarða hugsanlega fallist á slíka

breytingu ?  Vita þingmenn Norðvesturkjördæmis eða sveitarstjórnir af þessum

hugmyndum, ef réttar eru ?  Þetta mál, brotthvarf Þorsteins Jóhannessonar og

raunverulegar ástæður þess, og þrýstingur heilbrigðisyfirvalda í landinu á að

fækka skurðlæknum á landsbyggðinni, þarfnast frekari skýringa.

 

„Enginn veit hvað átt hefur fyrr en misst hefur“ segir máltækið.

Auðvitað hefur  Þorsteinn Jóhannesson fullan rétt á að taka sér hvíld eftir langan,

strangan og farsælan vinnudag, en hitt er verra ef ekki hefur ríkt skilningur á

mikilvægi hans sem skurðlæknis, þegar fyrrnefnt „samkomulag“ var gert.

Var reynt að fá Þorstein, fullfrískan mann á besta aldri, til að halda áfram sem

skurðlæknir eða var stefnan að hafa ekki lengur skurðlækni á staðnum ?

 

Þorsteinn hefur alla tíð staðið fastur fyrir, þegar reynt hefur verið af

stjórnvöldum, að veikja heibrigðiskerfið á Vestfjörðum. Nú reynir á hvort breyting

verður og forsvarsfólk HVEST taki baráttulaust við öllum fyrirmælum og

sendingum að sunnan.

 

 Magnús Reynir Guðmundsson

fyrrv. form. stjórnar Fjórðungssjúkrahússins á Ísafirði:

 

DEILA