Bókmenntaandi hefur um árabil svifið yfir vötnum á Ísafirði á sumardaginn fyrsta og er nú sem oft áður boðið upp á dagskrá helgaða börnum og bókum í menningarmiðstöðinni Edinborg. Umræða um lestur barna og barnabækur dúkkar upp með reglulegu millibili, en þó að hverjum kunni að sýnast sitt þá geta flestir sammælst um mikilvægi lestur í uppvextinum og að börn og ungmenni hafi úr vönduðum bókum að velja. Á síðasta ári fór foreldrafélag G.Í. í samstarfi við grunnskólann í átak til að efla bókakostinn á bókasafni skólans. Það tókst með ágætum og verður slíkt hið sama gert í ár. Penninn Eymundsson er líkt og þá í samstarfi við foreldrafélagið og í verslun hans á Ísafirði verða bækurnar á óskalistanum á 20% afslætti og verður listann að finna í versluninni fram til laugardagsins 29.apríl. Einnig ef einhverjir eiga þessar bækur heima við og vilja gefa þær til skólans má koma með þær á skrifstofu skólans á opnunartíma.
Allar bækur eru vel þegnar en óskalistinn fyrir bókasafn Grunnskólans á Ísafirði árið 2017 lítur svona út:
Spennusögur fyrir unglinga eftir norræna höfunda
Dramasögur fyrir unglinga
Enskar bækur fyrir unglinga
Útkallsbækurnar eftir Óttar Sveinsson
Bækurnar um Kidda klaufa eftir Jeff Kinney
Bækurnar um Skúla skelfi eftir Francecsa Simon
Randalín og Mundi bækurnar eftir Þórdísi Gísladóttur
Seiðfólkið I-VI eftir Jo Salmson
Bækur eftir David Walliams
Íslandsbók barnanna eftir Margréti Tryggvadóttur
Doddi, bók sannleikans eftir Þórdísi Gísladóttur og Hildi Knútsdóttur
Úlfur og Edda eftir Kristínu Rögnu Gunnarsdóttur
Endalokin eftir Birgittu Hassel og Mörtu Hlín Magnadóttur
Pabbi prófessor eftir Gunnar Helgason
Vetrarhörkur eftir Hildi Knútsdóttur
