Byggðarannsóknarstyrkur vestur

Úthlutun úr Byggðarannsóknasjóði var kynnt á ársfundi Byggðastofnunar þann 25. apríl. Eldra fólk, innflytjendur, lögreglan, ferðaþjónusta og sjávarlíftækni eru viðfangsefni þeirra rannsókna sem stjórn Byggðarannsóknasjóðs ákvað að styrkja í ár.

Eitt þeirra verkefna sem hlaut styrk að þessu sinni er rannsóknarverkefni Rannsóknarseturs á Ströndum og er heiti verkefnisins Samspil ímyndar, sjálfsmyndar, fjölmiðlaumfjöllunar og markaðssetningar í ferðaþjónustu. Að sögn Jóns Jónssonar, ábyrgðarmanns verkefnisins er markmið þess að greina og varpa ljósi á þau gagnvirku áhrif sem sjálfsmynd íbúa á tilteknum svæðum og ímynd sömu svæða hafa hvort á annað. Verkefnið snýst um að safna gögnum og rannsaka, greina og túlka samspil ólíkra þátta sem tengjast sjálfsmynd íbúa á afmörkuðu, fámennu og dreifbýlu landsvæði og ímynd byggðarlaga á sömu stöðum. Sérstaklega verða til skoðunar áhrif markaðssetningar svæðisins í ferðaþjónustu og umfjöllunar fjölmiðla á sjálfsmynd og ímynd. Eins verða skoðuð áhrif menningarverkefna og uppbyggingar þeirra á einstökum svæðum. Rannsóknarsvæðið er Vestfjarðarkjálkinn og verður aðferðarfræði og vinnubrögðum þjóðfræðinnar beitt við greiningarvinnuna.

Verkefnið verður unnið innan vébanda Rannsóknarseturs HÍ á Ströndum – Þjóðfræðistofu sem hefur höfuðstöðvar í Þróunarsetrinu á Hólmavík

Byggðarannsóknasjóður var stofnaður haustið 2014 og er fjármagnaður af fjárlagalið byggðaáætlunar og með framlagi frá Byggðastofnun. Til úthlutunar eru 10 m.kr. Auglýst var eftir umsóknum í sjóðinn í lok janúar og umsóknarfrestur rann út þann 9. mars. Alls bárust 25 umsóknir, samtals að upphæð 72,8 m.kr. Umsóknirnar voru afar fjölbreyttar og uppfylltu allar skilyrði sjóðsins.

 

Facebook Notice for EU! You need to login to view and post FB Comments!