Fjórir fjallaskíðamenn lentu í snjóflóði í Botnsdal á áttunda tímanum í gærkvöldi. Þrír mannanna lentu í flóðinu sem var tugir metra á breidd, en sá fjórði náði að skíða niður á undan flóðinu. Mennirnir þrír bárust niður hlíðina með flóðinu mislanga vegu, en enginn lenti undir flóðinu að öllu. Einn mannanna slasaðist á fæti og þurfti hann aðstoð við að komast úr flóðinu og var fluttur á Fjórðungssjúkrahúsið á Ísafirði í framhaldinu þar sem hann gisti í nótt. Flóðið varð norðanmegin í dalnum í 350-400m hæð rétt ofan við gangnamunna Vestfjarðaganga, en mennirnir sem eru allir vanir fjallaskíðamenn voru að ljúka stuttri skíðaferð þegar að flóðið kom.
Rúnar Óli Karlsson er einn þeirra sem sem þarna var á ferð og segir hann flóðið hafa verið þurrt flekaflóð, talsvert breitt, en þunnt: „Svona flóð fara hratt og það þarf ekki mikið til að kippa fótunum undan mönnum. Það brotnaði fyrir ofan okkur á tveimur stöðum.“
Gott veður var er ferðin hófst en á þeim tíma sem flóðið féll hafði sól gengið til viðar og skyggni lítið. Rúnar Óli segir að þeir hafi gert mistök, þar sem þeir fóru niður í talsverðum bratta, en segir ólíklegt að flóð hefði orðið hefðu þeir valið að skíða niður innar í dalnum í minni halla. Hann segir þá hafa vanmetið aðstæður. Þeim hafi verið kunnugt um veikleika í Kistufelli sem er ofan Skutulsfjarðar eftir að gryfja var tekin þar á föstudag af starfsmönnum Snjóflóðasetursins, en þeir hafi ekki endilega talið að sama ætti við í Súgandafirði.
„Við skíðum mikið þarna og kannski er maður orðinn full heimavanur, en ég hef sjaldan séð náttúrulegt flóð þarna á þessum stað þegar við höfum verið að skíða, þó þetta sé mjög þekktur snjóflóðastaður. Við gerðum klárlega mistök og þetta fer í reynslubankann.“ Segir Rúnar Óli sem er flestum hnútum kunnugur í fjallaskíðamennsku og segir hann ekkert hafa bent til þess að flóð gæti fallið er þeir gengu upp fjallið. Mennirnir voru allir vel búnir og með snjóflóðaýlur á sér. Aðspurður um hvort skapa þurfi meira aðhald utan um umferð fólks til fjalla að vetrarlagi svarar hann að upplýsingagjöf til ferðamanna sé ábótavant hér á landi, en fjallamennska, þá aðallega fjallaskíðaiðkun hefur orðið vinsælli með hverju árinu sem líður. Rúnar Óli segir upplýsingargjöf þó hafa batnað mjög mikið á síðustu árum með snjóflóðaspá Veðurstofunnar: „En auðvitað ferðast maður í fjalllendi á eigin ábyrgð og þarf að taka mið af aðstæðum hverju sinni.“
